A Igrexa de Santa Ana da Barcia do Seixo é un dos principais exemplos da arquitectura relixiosa do concello da Lama. De estilo barroco e construída en cantaría granítica, destaca pola elegancia da súa fachada, a espadana central e a calidade do seu conxunto arquitectónico, situado no corazón da parroquia de Santa Ana da Barcia do Seixo. Fronte ao templo atópase unha fermosa eira rodeada de hórreos, conformando un dos conxuntos etnográficos máis representativos do municipio. 

No seu interior consérvase un interesante patrimonio artístico, entre o que destaca un crucificado barroco de tamaño natural baixo a advocación do Santo Cristo dos Desamparados, así como diversas imaxes dos séculos XVIII e XIX e unha notable cruz procesional de prata. Xunto á igrexa sitúanse a antiga reitoral, un peto de ánimas, un calvario e unha fonte, formando un conxunto patrimonial de gran valor histórico e cultural.